VIGAN CITY- Maipatungpalen ti helmet ordinance iti syudad ti Vigan isu a maobligar dagiti driver ken pasahero ti motorsiklo nga aghelmet ket patien ti Vigan City police station a saan da a nagkurang iti panagiwaras ti impormasyon inaig iti maiyimplimentar nga allagadan.
Maibasar iti ordinansa, dagiti aglabsing iti umuna gundaway ket agmwelta ti lima gasut a pisos , iti maikadwa nga offense ket sangaribo a pisos ken iti maikatlo nga offense ken sumarsarano pay ket sangaribo lima gasut a pisos.
Dagiti helmet ket rumbeng nga adda ti Philippine Standard wennu PS mark na ken Import Commodity Clearance a naggapu ti Bureau of Products Standards.
Mainaig dayta ket maragsakan ni Police Superintendent Marlo Castollo, hepe ti Vigan City Police Station, ta sakbay ti implementasyon ti helmet ordinance na ket adun dagiti naghelmet ket namnaamen na nga agtungpal dagiti amin a motorista manipud ita nga aldaw.
