Immapela ni Health advocate Doctor Tony Leachon ken ni Presidente Ferdinand Marcos Jr nga ikkatenen iti puesto ni Health Secretary Ted Herbosa ken ti liderato ti Philippine Health Insurance Corporation.
Ti panawagan ni Leachon ket kalpasan nga inikkan ti kongreso ti zero budget ti Philhealth iti salinong ti 2025 national budget.
Binabalaw ni Leachon no apay a minilion a Pilipino ti nasken a madusa iti palpak ken nakapsut a liderato ti Philhealth, idinto a ni Herbosa nga agserserbi a chairman of the board ken President and CEO ti Philhealth ti nasken koma nga ikkaten ni Marcos gapu iti saanna a panangiyatiddug kadagiti benefit packages.
Innayon pay ni Leachon a saan a nasken a pabasulen ti kongreso ti Philhealth gapu kadagiti biddutna isu a naikkan iti zero budget para iti 2025, no di ket nasken nga aramaten ti kongreso ti oversight effort para iti pannakaipatungpal ti Universal Health Care law.
