VIGAN CITY – Addan iti kustodiya ti Explosive Ordnance Disposal (EOD) San Juan ti nasarakan a grenade hand fragmentation iti Miescor Infrastructure Development Corporation Tower Cell Site idiay Barangay San Ramon, Magsingal, Ilocos Sur idi kalman March 16, 2024 iti alas onse iti bigat.
Iti pannaki-uman ti Bombo Radyo Vigan ken ni Police Chief Master Sergeant Genero Verganio manipod Magsingal Municipal Police Station, adda ti timmawaga kadakuada a nangipakaammo inaig ti pannakasarak iti hand grenade iti bobeda ti daan a comfort room iti cell site bayat ti panagdalus ken preventive maintenance.
Segun ken ni Verganio, kumpleto pay laeng ti granada ket posible a bumtak pay laeng nu saan a nasayaat iti pannaka-iggemna isu a kinasapulanda a timmawag ti Explosive Ordnance Disposal (EOD) team para iti pannaka-alana.
Nupay kasta, saan nga umuna a gundaway nga adda nasarakan a granada iti nasao nga ili ta addan ti nairekord a naala idi kallabes a kukua ti dati a suldado.
Kabayatanna, binalakadan ni Verganio iti publiko a nu adda masarakanda a granada ket insigida nga ipakaammo kadagiti otoridad nangruna iti Explosive Ordnance Disposal (EOD) team para iti natalged a pannakaalana ken pannaka-dispose na.
VIDEO – POLICE CHIEF MASTER SERGEANT GENERO VERGANIO
