VIGAN CITY – Nakanselar pay laeng dagiti major event a maisaysayangkat kagiddan ti Halloween party idiay South Korea gapu ti napasamak nga stampede idiay Itaewon a nakatayan ti ginasut a tattao.
Iti pannaki-uman ti Bombo Radyo Vigan ken ni Bombo International News Correspondent Shaira Lorraine Robiñol, alas dyes iti rabii idi dinarup ti nakurang sangagasut a ribo a tattao ti maysa nga alley idiay Seoul gapu ti gagarda a makakita iti celebrity nga adda iti maysa nga establisimiento.
Saanen a makapagna pay dagiti tattao nga adda iti nasao nga alley isu a dagiti dadduma nga adda iti likodan a saan a makakitkita no ania ti mapaspasamak ket isuda ti agidurduronen.
Saan a nasaganaan ti Korean government ti pasamak ta saanda a ninamnama ti kinaadu dagiti tattao a dimmar-ay idiay Itaewon a gagangay a pappapan dagiti agtutubo ken gangannaet a kayatna a mapadasan ti night life isu a kaaduanna kadagiti natay a biktima ket university students wenno dagiti adda iti 20s na.
Innayon ni Robinol a kalpasan ti mano a tawen ket ita laeng ngamin nga adda manen dagiti nalukatan a festival ken maisaysayangkat a Halloween party ta naikkaten dagiti nadumaduma a Covid19 restrictions iti nasao a pagilian.
Nupay kasta, adu dagiti saan a nakaanges ken adu dagiti in-CPR da a tattao ngem nupay kasta, kinunana nga awan dagiti Pilipino a nairaman iti pasamak.
