VIGAN CITY – Maiwayat ti Narvacan Halloween 2022 Kids Costume Contest inton October 30 iti alas kuatro iti malem.
Ti pasalip ket silulukat para kadagiti agtawen iti sangapulo ket dua agpababa.
Dagiti agtawen iti innem agingga sangapulo ket dua ket karaman iti Red Category idinto a dagiti agtawen iti lima agpababa ket karaman iti Green Category.
Kasapulan nga agparehistro a nasapsapa dagiti makisalip babaen ti panangsuratda iti pormas iti online babaen iti link a masarakan iti facebook page ti Narvacan.
Mabalin met ti personal a panagparehistro idiay Municipal Hall wenno Mayor’s Office ken agingga laeng inton October 30 ti pawayway ti registration para iti online ken in-person.
Nasken nga adda dagiti partisipante iti venue sangapulo ket lima a minutos sakbay ti pasalip ken masapul a nakasuot ti costume-da no sumangpetda.
Mabalin nga agkawes dagiti sumali a kas superhero, fictional wenno fantasy character, wenno nakabutbuteng a pigura ken nasken a saan a bayolente dagiti maaramat.
Dua ti kategorya para iti costume contest ken ti top 3 a best costume iti kada kategorya ti mangabak iti PHP8K ti first prize; PHP6K ti 2nd prize; ken PHP4K ti 3rd prize.
Dagiti partisipante ket masapul nga addada a personal iti pannakayawag dagiti nangabak, ket no saan a maala ti nangabak ti premiona iti kaaldawan ti pasalip, mabalinna nga alaen iti Municipal Administrator’s Office.
