Impaganetget ti Gunglo Dagiti Mannurat nga Ilokano-Filipinas (GUMIL Filipinas) ti kalikagumda a naan-anay a mapakaamwan dagiti Ilokano maipanggep iti kinapateg ti pagsasao ken literatura nga Ilokano, kagiddan ti maisaysayangkat nga Amianan Book Festival 2026 iti Farmes Livelihood and Convention Center – Vigan City.
Iti pannaki-uman ti Bombo Radyo Vigan ken ni GUMIL Filipinas President Ariel Sotelo Tabag, agtultuloy ken saanda nga agsardeng nga agsurat ken mangipablaak kadagiti sinuratda babaen iti pagsasao nga Ilokano kas wagas iti panangipateg ken panangpatalinaed iti nasao a lenguahe.
Paset iti book festival ti panangisaknap dagiti literatura Ilokana ken panangam-ammo kadagiti mannurat nga agtultuloy nga agsursurat babaen iti panangaramatda ti Ilokano a pagsasao.
Tampok pay dagiti book seller, exhibitors ken nadumaduma nga aktibidad para kadagiti mahilig iti libro ken literatura.
Adda pay maisayangkat a lecture mainaig iti panagsuratan ken panagaramid iti libro.
Agpaot ti nasao nga aktibidad agingga inton bigat, Setyembre 5, 2026.
