VIGAN CITY – Inyetnagen ni Vigan City Mayor Carlo Medina dagiti sumagmamano a pagannurotan iti siudad tatta a general community quarantine uray nu awan pay dagiti guidelines nga aggapu iti national government.
Segun ken ni Medina, dagiti agtawen ti duapulo agpababa ken innem a pulo ket lima agpangato ket masapul nga agtalinaed da iti uneg iti pagtaengan idinto a dagiti rumwar ket masapul nga adda iti maipakita da nga ID kadagiti checkpoints ta awanen ti pass slip a maiwaras ngem nakadepende kadagiti kapitan iti kada barangay nu kasanu a bantayan da dagiti kalugaran da.
No iti pannakaipatungpal met ti liquor ban ket mabalin ti gumatang ken uminom iti arak ngem masapul nga aggyan da laeng iti uneg iti pagtaengan da ket saan da maki-karruba.
Kabayatanna, nu general community quarantine iti pagpapatangan, saan na a kayat a sawen a naluklukay dagiti otoridad nga agipatungpal kadagiti pagannurutan nu di ket ad-adu laeng dagiti negosyo a mapalubusan nga aglukat ket inyunay-unay ti mayor iti panagtulnog iti tunggal maysa tapnu naan-anay iti pannakaparmek iti COVID- 19.
