Kaso a grave threat ti sangwen ti maysa a Barangay Kagawad ti nangtutok ti paltog kadagiti dua nga indibidual sadiay Barangay Parparia, Narvacan, Ilocos Sur.
Ti suspek ket 39 years old, ken agnaed ti nasao nga barangay.
Dagiti biktima ket maysa nga lalaki agtawen ti tallo pulo ket maysa, maysa a merchandiser ken agnaed sadiay Orence, Narvacan, Ilocos Sur; ken ti kaduana a maysa nga LGBTQ member, beautician, agtawen ti uppat a pulo ket walo residente ti Barangay Dasay, Narvacan Ilocos sur.
Iti pannaki-uman ti Bombo Radyo Vigan ken ni PCpt. Jumar V. Castro nga OIC ti Narvacan Municipal Police Station, bayat ti panaggi-inom dagiti biktima iti maysa a natayan ket kellaat lattan nga immasideg ti suspek ket inasotna ti paltog manipod iti black sling bag-na ket intutokna kadakuada a nangsaludsudanna no dayoda agingga pinangtaanna ti LGBTQ member a paltoganna iti ulona.
Segun ken ni Castro, posible a naariwawa dagiti biktima ket naganawa laeng ti suspek kas maysa a kagawad ngem saanna a napuotan ti bagina a naglabesen iti inramidna gapu ta nagtutok iti paltog kadagiti biktima.
Nammoan nga awan ti riri iti nagbaetan ti suspek ken dagiti biktima idi kallabes ngem adda impluwensia iti arak ti suspek idi inaramidna iti nasao a panagpangta.
Iti panagresponde dagiti otoridad ket nakemmegda ti suspek ken naala ti paltog manipod kenkuana.
Iti agdama ket addan iti kustodiya iti kapulisan ti suspek para iti naan-anay nga imbestigasyon ken pannakaipila iti kaso a grave threat.
