VIGAN CITY – Pinasingkedan ti Department of Education a masapul a pagtalinaeden ti “proper decorum” kadagiti pormal a seremonya kas ti graduation rites uray nawaya dagiti estudiante a mangiyebkas iti bagi ken kaririknada.
Gapu dayta ti nagviral a video a pakakitaan kadagiti estudiante nga agsalsala iti entablado idi maawatda ti diplomada, a binalaw ti kaaduan ta kunada a saan a rebbengna iti dayta nga okasyon.
Dukduktalen ti DepEd no dagiti video ket kaano laeng wenno manipud pay kadagiti naglabasen a graduation ceremony ti pagadalan.
Segun ken ni DepEd Assistant Secretary for Operations Francis Bringas, bigbigenda nga adda dagiti internal policy dagiti pribado a pagadalan iti panangisayangkatda kadagiti aktibidad, isu nga isardengdan ti imbestigasyon iti pagadalan a nainaig iti video.
