VIGAN CITY-Nasurok 260 nga atleta ti Region IX wenno Zamboanga Peninsula para iti 2018 Palarong Pambansa iti nakipagpaset iti graduation ken moving up ceremony da idiay St. Paul Metropolitan Cathedral, Vigan City.
Manipud iti pakadagupan a bilang dagiti nagturpos, 144 iti Grade 6, 100 iti Grade 10 ken 19 iti Senior High School.
Segun kenni Eugenio Penales, chief athletic manager ti Zamboanga Peninsula, nupay adda dagiti atleta a sabali ti relihiyon na ket saan a nagbalin a problema iti pannakaisayangat ti seremonya iti Simbaan Katolika agsipud ta patien da a napatpateg ti pammati ngem iti relihiyon.
Saan a nakaatendar ni Pagadian City, Zamboanga Del Sur Mayor Romeo Pulmones ngem insuno iti asawa na a ni Mrs. Therrence Pulmones.
Maipalagip a nasapa a simmangpet ditoy probinsiya ti delegasyon ti Zamboanga Peninsula isu a saandan a nakaatendar ti graduation rites ken moving up ceremony kadagiti pagadalan da.
