Saan a ninamnama ti graduate iti University of Northern Philippines a ni Chrizelda Rodillas, Rank 7 iti Geodetic Engineering Licensure Examination a kinabaelanna ti agbalin a topnotcher.
Iti pannaki-uman ti Bombo Radyo Vigan ken ni Rodillas, naragsak ti riknana ta nagbungan dagiti sakripisyona idi agbasbasa pay laeng iti kolehio.
Makapasa laeng ti inarapaapna ket patienna a daytoy a balligina ket gapu iti kinapasnekna nga agadal.
Innayonna nga iti pamiliada ket isuna pay laeng ti kakaisuna a professional.
Ni Rodillas a taga-San Sebastian, San Vicente, Ilocos Sur ket nakagun-od iti 86 percent passing rate.
Kabayatanna, kinablaawan ni Engineer Isidoro Rusivin, Program Head ti Geodetic Engineering Program iti UNP ni Rodillas nga inladawanna kas maysa a napasnek nga estudiante ta nagserbi pay idi nga auditor iti Engineering Department Student Association.
Tawen 2012 idi naudi nga adda topnotcher ti UNP iti nasao a programa nga isu ni Gremhel Ramirez, Rank 6 iti Geodetic Licensure Examination.
Manipud kadagiti sangagasut a UNP graduate a nagexam, tallopulo ti nakapasa, katukad iti tallopulo a porsiento a passing rate idinto a 35.38 percent met kadagiti 1st taker.
