VIGAN CITY– Naragsak ken napalaus ti yaman ti maysa kadagiti nagasat a pimmasa ti Licensure Examination for Social Workers ta duapulo ket maysa manipod tallopulo ket lima iti passers a graduate iti University of Northern Philippines.
Iti pannaki-uman ti Bombo Radyo Vigan ti maysa kadagiti nagasat a nakapasa a ni Kenneth Serdenia, mapanunotna aminen a sakripisyona idi agbabasa pay laeng kasta pay ti nagbalin nga inspirasyona kadagiti nangtagtagibassit kenkuana.
Awan ti sayangenen ni Serdenia a gundaway ta inton maalana ti lisensyana ket insigida nga agbirukto iti trabaho tapno makasubad iti rigat ken sakripisyo dagiti nagannakna a nangpaadal.
Dagiti biddut ket inar-aramatna a pigsa a mangsaranget iti aniaman nga aspeto iti biag; panagtalek iti bagi ken panagkarkararag ti inub-ubrana tapno mapagballigianna ti eksam.
Para kenkuana, ti pannakapasana iti eksam ket rugi pay laeng dagiti amin nga arapaapna.
Kabayatanna, manipod iti nasao a nag-exam ket sangapulo ket uppat iti first taker idinto a pito iti second taker.
