Inallukoy ti Philippine National Police dagiti nagannak a bantayan dagiti aramid dagiti annakda tapno matarabayan ida ken maliklikan ti pannakairamanda iti ania man nga iligal nga aktibidad nangruna iti pagadalan.
Segun ken ni PNP chief Gen. Jose Melencio Nartatez Jr., inaramidna daytoy a panawagan kalpasan a matiliwan ti maysa a Grade 7 student idiay Talisay City, Negros Occidental iti paraphernalia ti iligal nga agas ken maysa a kutsilyo iti uneg ti pagadalanda idi June 8.
Naipan iti barangay hall ti estudiante ket kunana a ti patadem ken dagiti paraphernalia ket kukua ti kasinsinna nga impaidulinna laeng kenkuana.
Imbilin ti PNP ti nainget nga imbestigasion tapno mabigbig ti amin nga adda pakainaiganna iti insidente.
Impaganetget met ti opisial a ti pannakipaset dagiti nagannak ket saan laeng nga agpatingga iti uneg ti pagtaengan no di ket nasken pay iti inaldaw-aldaw nga aramid ken dagiti tao a makapulpulapol dagiti annakda.
