VIGAN CITY- Naipaagas idiay Northside Doctor’s Hospital ti babai nga estudyante ti Grade 4 idiay San Mariano Elementary School, Bantay a nadungpar ti Mitsubishi L300 a minaneho ni Renato Beharin, driver ti Divine Word College-Bangued, Abra ,idiay national highway ti Taleb, Bantay.
Segun kenni Beharin, saan a napaspas ti panagpataray na ti lugan ngem kellaat a bimmalasiw ti ubing iti kalsada isu a nadungpar na.
Inaklon na a tarayan na kuma ti ubing ta sumuko laengen idiay Santa police station ta mabuteng a kabilen dagiti agnaed idiay Taleb ngem babaen ti tulong dagiti barangay official ket naallukoy met laeng a sumuko idiay Bantay municipal police station.
Ti Mitsubishi L300 ket nagluganan dagiti sangapulo nga estudyante ti DWCV-Bangued ken mangisursuro a napan nakisalip idiay University Of Northern Philippines.
