VIGAN CITY – Nadunor ti maysa nga estudyante ta binagkong ti maysa a menor de edad a lalaki ti Diversion Road idiay Barangay Raois, Vigan City, Ilocos Sur itay 3:15PM (June 20, 2024).
Ti biktima ket nabigbig a ni Patrick Belga Barroga, agtawen-iti-sangapulo ket siam, Grade 12 student nga agnaed iti nasao a lugar idinto a ti suspek ket agtawen iti sangapulo ket innem a taga-Rugsuanan, Vigan City.
Iti pannaki-uman ti Bombo Radyo Vigan ken ni PMaj. Christopher Ramat a Deputy Chief of Police Vigan City Police Station, dati a riri ti rason iti pammagkong ta tunggal agawid ti biktima ket padpadaanan ti suspek iti ruar ti Ilocos Sur National High School isu a patienda a naplanon ti insidente.
Segun ken ni Ramat, nagturong ti suspek iti lugar ti biktima kaduana ti tallo a lallaki ket kinaritda nga agsasangoda iti Diversion isu nga immannugot ti biktima ket nagkikitada.
Apaman a nakababa iti motorsiklo ti biktima ket binagkong ti suspek iti likodna a nakatamaan ti tengngedna.
Insigida a naipan ti biktima iti Ilocos Sur Provincial Hospital – Gabriela Silang, Tamag, Vigan City para ti pannakatamingna ket iti agdama nasayaaten ti kasasaadna idinto a nakemmeg ti menor de edad a suspek babaen kadagiti barangay officials ket naipanda iti Vigan City Police Station.
Narekubre ti naaramat a double-bladed knife nga umabot ti pito a pulgada ti kaatiddogna pakairamanan ti apputanna.
Manamnama a maiturn-over ti menor de edad iti City Social Welfare and Development bayat a maisagsagana dagiti dokumento para ti mayannatup a dusa.
VIDEO – PMAJ. CHRISTOPHER RAMAT
