Minor injuries ti sinagaba ti lalaki a nagmaneho iti motorsiklo a naidungpar iti concrete barrier ken naitapwak manipod rangtay iti national highway idiay Barangay Gongogong, San Ildefonso, Ilocos Sur iti oras ti alas tres singkwenta idi kalman, May 2, 2025.
Ti nagmaneho iti motorsiklo ket agtawen iti tallopulo ket uppat, naasawaan, government employee, holder iti driver’s license, nagaramat ti helmet nga agnaed idiay Barangay San Julian Norte, Vigan City.
Iti pannaki-uman ti Bombo Radyo Vigan ken ni PLt. Benito Ponce Jr. a Deputy Chief of Police iti San Ildefonso Municipal Police Station, iti CCTV footage ket awan ti nasabat ti driver kellaat a nadungparna iti barrier iti tengnga iti kalsada isu a naideretso iti concrete barrier iti igid ti kalsada a rason metten iti nakatinnaganna iti kataltalonan.
Segun ken ni Ponce, agsikko koma ti driver ngem posible a saanna a natansya isu a napasamak iti aksidente.
Naammoan a ti nakapasamakan iti disgrasya ket maibilang nga accident prone area iti ili.
Saan met unay a napakaroan ti driver a naipaagas iti ospital idinto nga adda laeng dadael ti akin-kannawan a paset iti luganna.
Gapu ti pasamak ket nagpalagip ni Ponce kadagiti motorista nga agannad iti panagmaneho ket nu kas bilang saan a kabaelanen ket nasaysayaat nga aginana pay laeng.
