VIGAN CITY – Nagyaman ni Governor ken incoming Vice Governor Ryan Singson iti suporta nga impaay kenkuana dagiti agindeg iti probinsia idi eleksyon.
Iti pannaki-uman ti Bombo Radyo Vigan ken ni Singson, apresyarenna ti naited kenkuana a suporta nga isu ti pagbalinenna nga inspirasyon tapno ilalaing ken igag-gagetna pay ti agserbi.
Pinagyamananna pay dagiti mangisursuro a nagboluntaryo a mangkita iti pagsyaatan dagiti umili ta idi eleksyon ket awan met unay dagiti nairekord a parikut agsipud ta simmurot dagiti botante iti protocols.
Kiniddaw ti gobernador nga itan a nalpas ti eleksyon ket lipatenen ti pulitika ta nasaysayaat no suroten ti unity nga ibagbaga ni presumptive President Ferdinand “Bongbong” Marcos Jr. ta pudno a masapul ti panagkaykaysa ken panagtitinnulong.
Aminado ti gobernador a narigat ti sitwasyon ti pamilia Singson ken ti pamilia Savellano iti naglabas nga eleksyon gapu ti gulo a napasamak ngem pagyamanan latta ti pamilia Savellano iti napintas a panangtratoda kenkuana.
Kayatnan a masimpa ti saan a pagkikinnaawatan iti pamiliada ta patienna a daytoy ket manglapped laeng kadakuada iti inda panagserbi.
