VIGAN CITY – Inlawlawag ni Governor Jeremias “Jerry” Singson a saan a gapu kenkuana no apay a mataktaktak ti sueldo dagiti job order iti maysa a district hospital ditoy probinsia ta sipud nagtugaw kas gobernador ket nainget ti panangibilinna a nasken nga “on time” da iti amin a banag.
Segun ken ni Governor Singson, no adda man ti pannakataktak iti sueldo ket basul ti maysa nga ospital a nabuntog ti panangiprosesoda kadagiti paperwork ken payroll.
Innayon ti gobernador nga awan ti rason nga isu ti ayan ti parikut iti pannakataktak ti sueldo ta no ammona met nga usaren dagiti pondo.
Malaksid dayta, mariknana ti rigat dagiti job order a bassit ti sueldoda isu a saanna kayat a maladaw a maited kadakuada.
Impasigurado met ti gobernador a paguniananto ti hepe ti Narvacan District Hospital tapno kitaen a nasyaat no ania ti pagdurdur-asanen ti nasao a banag ken no siasino ti mangiprosproseso dagiti payroll ti job order.
