VIGAN CITY – Nagkiddaw ti pammakawan ni Governor Jerry Singson iti publiko iti kinunana a nagkurangan ti provincial government iti Miss Ilocos Sur 2023 a maysa kadagiti highlight ti Kannawidan Festival.
Dayta ket kalpasan nga adda dagiti nagkomento ken nang-bash iti ladawan dagiti kandidata a naipost iti social media.
Iti pannaki-uman ti Bombo Radyo Vigan ken ni Governor Singson, awan ti perpekto a tao ken inkarina iti nasaysayaat a Kannawidan iti masangsangwanan.
Innayonna a responsibilidadna kas ama ti probinsia ken Chairman iti Kannawidan Festival ti napasamak isu a pagyamananna met dagiti nagkomento kadagiti ladawan ti kandidata ta daytoy ket agserbi a pagadalanda.
Aminado ti gobernador nga uray isuna a nakakita kadagiti ladawan ket nadismaya ngem maawatanna met ta mamati nga amin a tao ket adda latta pagbiddutanna.
