VIGAN CITY – Impasigurado ni Gobernador Jerry Singson nga awan ti mapaspasamak a black sand mining iti Caoayan, Santa ken iti Vigan isu nga awan ti nasken a pagdanagan dagiti umili.
Iti pannaki-uman ti Bombo Radyo Vigan ken ni Singson, ti kaadda dagiti barko ket para laeng iti maaramid a dredging iti Abra river nga isu ti napagtutulagan babaen iti kompanya nga Isla Berde Mining and Development Corporation sipud adda pammalubos kadakuada ti Department of Environment and Natural Resources Region 1.
Kinuna ti gobernador a dakkel ti maitultulongna ti nasao a kompanya para iti ar-aramidenda a dredging tapno maliklikan ti layus nangruna ta narabaw unayen ti karayan ket posible pay ti pannakadadael dagiti pagtalonan.
Nabayagen a nagapply ti nasao a kompania idi pay laeng napalpalabas nga administrasyon ngem saan a karaman iti katulagan ti black sand mining.
Numan bilang adda met mailaok a black sand iti aramiden ti nasao a kompanya a dredging ket pagpapatangan ti munisipio no kayatda nga ilako.
