VIGAN CITY – Kalikagum ni Governor Jeremias “Jerry” Singson nga adaptaren dagiti naadalna manipud iti inatendaranna a 3rd Edition Agri Expo Thailand 2022 ken ti Khonkaen International Convention and Exhibition, Mueang Khon Kaen District idi Setyembre 7 kaduana ni Provincial Agriculturist Teofilo Quintal.
Iti pannaki-uman ti Bombo Radyo Vigan ken ni Singson, adu ti nasursuroda iti idadar-ayda ti nasao nga event nangruna no maipanggep iti husto a tiempo ti panagmulaan ken panagraep kasta payen a nakapatpatangna dagiti Thailand, Vietnam ken dagiti agricultural engineer.
Malaksid ti dayta, nakita ti gobernador dagiti nadumaduma nga agricultural equipment ken ti pannakasursuro kadagiti sabali pay a banag a mabalin a maipatungpal met ditoy probinsia tapno sumayaat ti panagtalon ken iti sistema ti panagganansya.
Maysa kadagiti ad-adalenda ita ti panaggatang iti tractor nga agduduma ti function-na ta no saan nga adayo ti presyona ditoy Pilipinas ket nasaysayaat no iti met laeng pagilian ti paggatanganda.
