Kayat a masigurado ti gobierno a patas ti trial nga isayangkatda ken ni dati a Presidente Rodrigo Duterte iti International Criminal Court mainaig iti reklamo a crimes against humanity.
Segun ken ni Palace Press Officer Usec. Atty. Claire Castro, maibasar iti Republic Act 9851, kas Pilipino, saan laeng a dati a presidente ni Duterte, no di ket masapul a siguradoen ti gobierno nga adda ti fair trial nangruna ta Pilipino ti dati a presidente.
Sumango ni Duterte kadagiti hurado iti hearing ita nga aldaw ket maipakaammo kenkuana dagiti krimen a naaramidna, agraman ti karbenganna kas maysa a defendant.
Pinasingkedan met ni Silvestre Bello, maysa kadagiti abogado ni Duterte nga irupirda ti temporaryo a wayawaya ti dati a presidente manipud iti ICC prison.
Iti pagannurotan ti ICC, madakdamat a ti akusado nga indibidual ket mabalin nga agkiddaw para iti interim release maibasar kadagiti kondisyon ken konsiderasyon nga ipalpalubos ti korte.
