VIGAN CITY – Nabuntog ti panagtignay ti gobierno idiay Hungary sipud idi nagraira ti COVID19 pandemic kas napaliiw ni Bombo International Correspondent Avegail Semillano, maysa a scholar iti nasao a pagilian ken taga-Muntinlupa City.
Segun kenni Semillano, saan unay a nainget ti panangipatungpal ti Hungarian government kadagiti pagannurotan a masurot tapno maliklikan ti nasao a virus ta tatta laeng a tiempo a naipatungpal iti rumbeng a panagaramat dagiti agindeg iti facemask ken idi March a na-lockdown dagiti Hungarian provinces ngem no pay kasta ke nababbaba ti bilang dagiti natay ken ad-adu dagiti nalaingan.
Kabayatanna, adda ti nakaituding nga oras a panagruar dagiti senior citizen ken dagiti agtutubo a mapan aggatang kadagiti kasapulanda wenno adda iti napateg a gagarada.
Malaksid iti dayta, pinasingkedan ni Semillano a no man pay naipasarra dagiti pagadalan ken dagiti dadduma nga establisimento ket agtultuloy latta ti pannakaisayangkat ti klaseda babaen iti online ta nakaituding a maileppasda amin inton sumaruno a tawen nga isu ti tiempo a panagturposda.
