Inlawlawag ti Malakanyang nga awan ti parikot ti gobierno iti panagbayad ti hospital bills a sakup ti Guarantee Letter iti salinong ti Medical Assistance for Indigent and Financially Incapacitated Patients wenno MAIFIP.
Dayta ket kalpasan nga impakaammo ti Private Hospitals Association of the Philippines Inc. (PHAPi) a saanda pay laeng nga umawat ti Guarantee Letters para kadagiti pasyente a sakop iti programa.
Mapapati a P530 million pay iti saan a nabayadan a claims para kadagiti serbisyo medical a naipaayen.
Kinuna ni Palace Press Officer Claire Castro a tallopulo ket siam a pribado nga ospital idiay Batangas ti adda isyu ita ti claims maipanggep ti guarantee letters ta awan pay ti mayannatup a dokumento a maipasan dagitoy.
Impalagip ni Castro nga iti salinong ti Universal Health Care Act ket adda guaranteed a 10% nga authorized bed capacity dagiti pribado nga ospital ti zero billing.