Ad-adalen ti gobierno ti panangted iti cash aid kadagiti minimum wage earner, middle class, ken dagiti kameng ti gobierno a naapektaran iti panagpangina ti presio ti produkto-petrolyo.
Segun ken ni Palace Press Officer Claire Castro, nakadepende iti kabaelan ti pondo ti gobierno no maipatungpal ti nasao a tulong-pinansial.
Inlawlawag ti Malakanyang nga ad-adda a natutukan ti transport sector gapu ta isuda ti direkta a naapektaran ken kangrunaan nga agkasapulan iti ayuda.
Ibalbalanse pay ti presidente dagiti addang tapno saan a dagus a ngumina ti plete ken makagiddan ti kaadduan.
Iti agdama, kinuna ni Castro nga adda dagiti agpampannuray nga addang tapno maliklikan ti epekto ti krisis, agraman ti libre a sakay ken diskwento iti plete iti LRT ken MRT, a pakaganaran dagiti mangmangged ken middle class.
