VIGAN CITY – Inparuwar ni Governor Ryan Singson ti Executive Order 23 inaig iti panangisayangkat kadagiti naduma-duma a wagas tapnu maparmek iti sakit a dengue ditoy probinsiya.
Nabilin dagiti mayor ken amin a barangay officials nga idaulwan da iti inaldaw nga Operation Taob wennu 4 o’clock clean-up habit kadagiti pagtaengan.
Dagiti met opisyal ti Department of Education kadagiti elementary schools ken public highschool iti mangidaulo ti 4 o’clock clean-up habit kadagiti pagadalan ken ibaga da kadagiti ubbing nga agaramat da ti insect repellant lotion kadagiti paset ti bagi a posible a kagaten ti lamok.
Malaksid iti dayta, nabilin pay dagiti barangay health workers a bagbagaan da dagiti nagannak a nu aggurigor dagiti annak da ket insigida nga agpakonsulta da ti Municipal Health Officer wennu doktor.
Inbilin pay iti gobernador babaen iti nasao nga executive order a masapul ti inaldaw a panangireport ti amin a dengue cases kadagiti pribado ken publiko nga ospital ken makammo dagiti municipal ken city mayor a mangideklerar ti lugar da iti state of emergency wennu epidemic nangruna kadagiti ili a naartapan dan iti alert wennu epidemic threshold.
