Pinadayawan ni Senator Christopher “Bong” Go ita a National Heroes Day ti sakripisio ken serbisio dagiti baro a bannuar ti pagilian a pakairamanan dagiti healthcare workers ken overseas Filipino workers (OFWs).
Impila manen ti Senate Committee on Health Chairperson iti panagiruar iti Health Emergency Allowances (HEA) para kadagiti kualipikado a healthcare worker.
Linagip ni Go ti akemna kas maysa nga author ken co-sponsor ti Republic Act No. 11712 wenno linteg a mangipaay iti health emergency allowance para kadagiti mangimatmaton ti salun-at ken kinatalged iti publiko ken pribado a sektor.
Pinasingkedan pay ti senador kas Vice Chair ti Senate Committee on Migrant Workers iti napateg a kontribusion dagiti OFW a maawagan nga “modern-day heroes” para iti sakripisioda iti sabali nga pagilian tapno maipaay ti kasapulan ti pamiliada.
