VIGAN CITY – Sangagasut sangapulo ket innem a karton ti nadumaduma a meat products nga aggatad iti PHP193,908 ken tallopulo ket lima a sako ti marinated chicken nga aggatad iti PHP109,600 ti nasalamaan iti Animal Quarantine Checkpoint idiay Barangay Bio, Tagudin a dagitoy ket naggapu idiay Pangasinan.
Ti Rebuilt Ref Van a nagkargaan iti 116 boxes ti nadumaduma a meat products ket minaneho ni Mark Joshua Cabaddu, agtawen iti duapulo ket dua ken ti kaduana a ni Mariano Magaddatu, agtawen iti duapulo ket maysa ken ni Cirilo Yden Jr., agtawen iti duapulo ket innem nga agpapada a taga-David Mangaldan, Pangasinan.
Ti met Rebuilt Fuso Ref Van Truck ket minaneho ni Aljun Salamat, agtawen iti tallopulo a taga-San Fabian, Pangasinan ken kaduana a ni Jhonel Doria, agtawen iti duapulo ket dua a taga-San Jacinto, Pangasinan.
Awan ti shipping permit, meat inspection certificate, ken saan a naipainskpeksyon iti quarantine checkpoint dagiti dua a lugan a nangikarga kadagiti kontrabando nga adda itan iti kustodia ti Provincial Veterinary Office.
Segun ken ni Provincial Quarantine Officer Martel Quitoriano, natiliw manen idi dagiti nagipastrek kadagiti nasao a kontrabando ken inrasonda a naladaw ti pannakaaprubar ti papelesda ita a maikadua a gundawaydan a maduktalan nga iligal ti panagiserrekda kadagiti meat product.
Gapu dayta, kayat ni Quitoriano a maipakat ti nadagdagsen a muelta wenno pannakaibabawi ti permit/lisensyada tapnon malapdan ti iseserrek dagiti meat products ta agtultuloy pay laeng ti pangta ti African Swine Fever ken ti panagraira ita ti bird flu.
