VIGAN CITY – Mamati ni Samahang Weightlifting ng Pilipinas (SWP) president Monico Puentevella a nu saan a sukatan ti Gilas Pilipinas iti plano da para ti laban da kontra ti Angola ket pulos a saan a mangabak ti Pilipinas iti group phase ti FIBA World Cup 2019 idiay Foshan province, China.
Ti pannaki-uman ti Bombo Radyo Vigan ken ni Puentevella, maladingitan ti opisyal gapu ti napasamak iti ay-ayam ti Gilas kontra ti Italy ken Serbia ta inpakita la unay dagiti Pinoy cagers a saan da a nakasagana ken saan da a natutukan iti panagsanay da.
Kinunana, nakakatkatawa a panunuten a kanayon a maipadamag a nainget iti panagsanay dagiti Gilas players ngem kasjay a klase ti ay-ayam iti inpakita da idi August 31 ken idi rabii ta intulok da a natambakan da a perme ti Italy ken Serbia.
Maipalagip nga idi August 31, naabak ti Gilas kontra ti Italy iti iskor a 108- 62 idinto nga idi rabii ket inluges-luges manen ti Serbia ti Gilas iti iskor a 126- 67.
