Sabsabali ti nagbalin a selebrasyon iti maika-sangapulo a Pinya Festival idiay Pudtol, Apayao ta tampok ti dakkel a pinya installation a ti kangatona ket nasurok 32 ft,11 ft ti kaakabana, ken buklen daytoy ti 2,823 a presko ken pudno a pinya.
Narambakan daytoy kagiddan ti International Pineapple Day ket tampok ti obra kas simbolo iti kinagaget ken panagkaykaysa ti komunidad.
Segun iti Pudtol Local Government Unit, dagiti pinya ket naggapu iti apit dagiti mannalon, ket gagemda a maipromote ti local agriculture ken padayawan dagiti kangrunaan a produkto ti ili.
Ti panagaramnid iti dakkel a pinya ket agpaot iti mano a lawas babaen iti tulong dagiti volunteers, local officials, ken dagiti organisasyon iti komunidad.
Agserserbi daytoy a sentro ti atraksyon iti festival, ta rinibo a residente ken bisita ti dimmar-ay tapno maimatangan.
