Iti tengnga ti panagngato ti bilang ti nairekord a kaso ti Suicide idiay Metro Manila, idurduron ni Senador Sherwin Gatchalian ti naing-inget a panangipatungpal ti komprehensibo a programa iti mental health.
Segun ken ni Gatchalian, maysa a napateg nga addang ti panangipatungpal ti nadakamat a programa a mangted ti proteksion kadagiti Pilipino nga agkasapulan ti tulong tapno maliklikan ti pannakapukaw ti adu a biag.
Ti panawagan ti senador ket kasaruno ti report ti National Capital Region Police Office ket rimmuar a nagdoble iti bilang ti suicide cases iti NCR iti immuna a tallo a bulan ti agdama a tawen.
Nakairekord ti NCRPO ti 111 a kaso manipud Enero 1 agingga March 23, 2026, nangatngato ngem iti 38 a kaso a nairekord ti kapada a bulan idi napalabas a tawen.
