VIGAN CITY – Baklayen ti Philippine Sports Commission ti amin a gastos dagiti Pinoy athletes nga adda kadagiti naduma-duma a pagilian a saan a nakaawid gapu ti COVID- 19 outbreak.
Dayta iti pinasingkedan ni PSC Commissioner Celia Kiram iti pannaki-uman kenkuana ti Bombo Radyo Vigan.
Karaman kadagiti nasao nga atleta ket ni EJ Obiena nga adda itatta idiay Italy ken ni Hidilyn Diaz nga adda idiay Malaysia.
Kabayatanna, awan pay laeng ti Pinoy athletes a nagpositibo ti nasao a sakit a kas maibasar iti inaldaw a monitoring ti PSC kadagiti amin a National Sports Association.
Adda dagiti tallo pulo nga atleta a saan a nakaawid kadagiti probinsiya da gapu ti enhanced community quarantine ditoy Luzon isu nga agtaltalinaed da kadagiti dormitory idiay Philippine Institute of Sports, Football and Athletics Stadium wennu sigud nga ULTRA stadium nga ik-ikkan ti PSC ti inaldaw a kanen ken vitamins da tapnu agtalinaed da a nasalun-at.
Pinasingkedan pay ti PSC commissioner a maisagsaganan dagiti sports facilities da a maaramat kas COVID- 19 facility kas ti Rizal Memorial Sports Complex ken dadduma pay.
