Umabot iti P214.75 billion ti sapul ti industria ti ay-ayam iti pagilian manipod Enero agingga Hunyo ita nga tawen gapu ti online betting.
Segun iti Philippine Amusement and Gaming Corporation (PAGCOR), ngimmato ti 27.6% ti sapul manipod iti P171 billion idi napalabas a tawen iti isu met laeng a tiempo.
Kangatoan ti kontribusyon ti electronic gaming sector kas ti e-games, e-bingo, ken bingo a nakasapul ti P114.83 billion (53.47%), sarunoen dagiti lisensiado a casino a nangipaay ti P93.36 (43.47%) billion, idinto a dagiti PAGCOR-operated casinos ket nakagun-od met iti P6.56 billion (3.06%).
Pinasingkedan ni PAGCOR Chairman Alejandro Tengco a gagem ti korporasyon a masigurado a ti panagdur-as ti industria ket maibasar iti responsable a panagay-ayam kas pannakitinnulagna iti Ad Standards Council nga ingitan ti regulasion dagiti komersial ti sugal, ken naibilin nga ikkaten dagiti gambling ads kadagiti publiko a lugar ken primetime. -Augie Arellano
