Target ti Senado nga aprubaran inton sumaruno a lawas ti gakat a mangted turay ken ni Presidente Ferdinand Marcos Jr nga ikkaten wenno kissayan ti excise tax iti produkto petrolyo iti panawen ti national wenno global economic emergencies.
Dayta ket kalpasan a sinertipikaran ti Presidente kas urgent ti gakat.
Iti surat a napetsaan iti Marso 12 ken ni House Speaker Faustino Dy III, kinuna ni Marcos a masapul ti dagus a panangipasa iti House Bill No 8418 tapno mapalubosan ti gobierno a mangsulbar a dagus iti epekto ti world prices ti langis.
Segun ken ni Senate Majority Leader Juan Miguel Zubiri, dagus a matignayan iti plenaryo ti gakat no maipasa ti Kamara ti bersyonda iti Senado.
Iti salinong ti Konstitusion, ti tax measure ket nasken nga aggapu iti lower chamber ti Kongreso.
