Gakat a mangiparit kadagiti agtawen iti sangapulo ket tallo agpababa a maaddaan ti social media, aprubado iti second reading ti Kamara

Naaprubaran iti maikadua a pannakaibasa iti House of Representatives ti gakat a mangiparit kadagiti agtutubo nga awan pay ti sangapulo ket tallo a tawen da a maaddaan ti social media accounts.

Inisponsoran ni House committee on basic education chairman ken Pasig City Rep. Roman Romulo ti House Bill (HB) 11566 wenno “Children’s Digital Safety, Protection and Well-Being Act”.

Kalpasan ti sumagmamano nga interpelasion ket napagbotosan daytoy iti maikadua a panagbasa babaen ti viva voce voting.

Iti salinong ti gakat, maiparit a maaddaan ti social media accounts dagiti agtutubo nga agtawen iti sangpulo ket tallo agpababa ken dagiti agtawen iti 13 agingga 18 ket kasapulan ti consent ti nagannak sakbay a maaddaan ti access iti social media.