VIGAN CITY – Kaso a Qualified Theft ti sangwen ni Ronnel Hidalgo, agtawen iti tallopulo ket uppat, welder a taga-Brgy. Banaoang, Bantay gapu ti panangserrekna iti warehouse a pagtrabtrabahoanna idiay Brgy. Taleb, Bantay.
Segun iti Bantay Municipal Police Station, naalaan ti CCTV footage ti suspek a napan iti warehouse ti nasao a lugar a nangala iti electric wire nga aggatad iti PHP4,590.
Awan ti tao idi simrek iti warehouse ti suspek agingga a nadlaw ni Kimberly Ann Prades, admin officer ti nasao a construction supply a sumrek a maymaysa ti suspek a gapuanan tapno ireview na ti CCTV ket nakitana a nagala ti suspek isu nga impakaammona iti Equipment Manager a ni Darwin Parilla babaen ti panatawagna iti telepono ket insigida a napan iti pwestoda.
Pinagelan ni Parilla ti suspek ket naduktalanda nga adda impanna iti bag-na.
Insigida nga inpan ni Parilla ti suspek kadagiti otoridad ket naipan iti Gabriela Silang General Hospital para iti medico legal examination-na ken addan iti kustodia ti kapulisan tapno maidalan iti husto a proseso.
Iti pannaki-uman ti Bombo Radyo Vigan ken ni Hidalgo, naaramidna ti agtakaw gapu ta agkurkurang ti sueldona ket masapulna ti agbayad iti motorsiklona kasta payen a ti asawana ket tallo bulan a masikug.
