VIGAN CITY – Nayuswat iti University of Northern Philippines ti full online enrollment system para kadagiti agad-adal a mabalindan ti agbayad, agenrol ken makita iti grades da iti online.
Ti programa ket indaulwan ni UNP President Dr. Erwin Cadorna nga inatendaran dagiti nadumaduma nga opisial ken stakeholders.
Iti pannaki-uman ti Bombo Radyo Vigan ken ni Dr. Bryan Lamarca, Head Management Information System, mabalin a makaaramid dagiti nagannak iti account tapno makitada dagiti baybayadan ken grado dagiti annakda nga agad-adal.
Ti pay laeng Landbank ti agdama a payment scheme para kadagiti agbayad iti matrikulada ket numan bilang adda dagiti reklamo wenno saan a mawatan dagiti agad-adal ket mabalinda a kontaken dagiti maseknan a tattao manipud iti oras ti alas otso iti bigat agingga alas singko iti malem.
Nupay kasta, kiniddaw ni Lamarca kadagiti stakeholders, estudiante ken nagannak iti panaganus ken panangawatda ita a maikawada pay laeng iti baro a sistema ti panagenrol iti nasao a pagadalan.
