Saan pay a mapagpatpatangan iti Malakanyang ti pannakaipaay ti fuel subsidy kadagiti pribado a motorista wenno dagiti karaman iti middle-income class.
Dayta ti Inlawlawag ti Malakanyang kalpasan a masaludsod no mairamanen kadagiti programa dagiti pribado a motorista, kasaruno ti panangibaga ti administrasion a tutukanda ti pagkasapulan ti middle-income Filipinos iti nabatbati a termino ni Presidente Ferdinand Marcos Jr.
Segun ken ni Palace Press Officer Usec. Atty. Claire Castro, ad-adalen pay laeng ti administrasion ti nadumaduma a programa tapno matulongan dagiti Pilipino a naapektaran iti nangina a presio ti langis ken kangrunaan a magatang gapu iti agtultuloy a rinnupak iti Middle East.
Karaman kadagiti umuna a gakat ti income tax exemption.
Nupay kasta, pinasingkedan ni Castro a saan a karaman iti madama a mapagpapatangan ti fuel subsidy para iti middle-income class.
Iti agdama, P12 kada litro ti fuel subsidy para kadagiti tsuper ti jeep ken UV Express.
