VIGAN CITY – Adda ti baro a programa ti TESDA a naawagan a “Free Online Course” para kadagiti amin a mangayat a makasursuro tatta a panawen ti community quarantine.
Segun kenni TESDA Regional Director Vince Cifra, iti nasao a programa ket makita dagiti estudyante ti instructor-da a mabalinda a pagtuladan kabayatan iti pannursuro kadakuada ken adda ti idiayada a kurso para kadagiti agtutubo kas kadagiti kurso a mainaig iti agrikultura a maysa met kadagiti makatulong para iti amin.
Impannakkel ni Cifra nga adda pay ti OPLAN TESDA ti ahensiada nga addaan ti tallo a paset kas ti survival face, transitional face ken structural face a babaen iti dayta ket matulonganda dagiti agkasapulan ken kasta met ti panangtulongda kadagiti frontliner.
Kabayatanna, babaen met ti TESDA Bayanihan Program ket nakaaramidda ti 25,855 a facemasks ken 2,000 a face shields para kadagiti mannalon, frontliner ken dagiti opisial iti lokal a gobierno.
No pay kasta, immunan a kinuna ti nasao nga opisial a saanda a lapdan ti siasino man nga agkolehio ngem no kas man bilang saanda a kabaelan ket adda met ti ahensiada a nakasagana a mangidiaya ti kurso para kadakuada ta pinasingkedanna nga adun dagiti nagballigi a nakaturpos babaen iti TESDA.
