Maidiaya ti ‘free ligation’ kadagiti amin nga ina a kontenton iti bilang ti annakda ken kayatna ti agpaidalan iti permanente a wagas ti family planning inton July 16-18, 2025.
Ti free ligation ket paset ti Service Outreach Delivery Extension Program ti DKT Philippines Foundation babaen iti pannakibinnuligda iti Ilocos Sur Provincial Government.
July 16 ti batang ti ili ti Ilocos Sur District Hospital – Sta. Lucia, July 17 ti ISDH – Narvacan ken July 18 ti ISDH – Magsingal ken Sinait.
Iti pannaki-uman ti Bombo Radyo Vigan ken ni Provincial Population Officer Francis Dacanay, gagem ti programa a maipatungpal ti family planning ken responsible parenting program.
Addanto ti bus a mapan kadagiti naituding a district hospital nga isu ti agserbi nga operating room ken awan pulos ti gastusen ti pasyente.
Dagiti interesado nga aplikante ket turongenda laeng ti Municipal Health Office iti lugarda tapno isudanto ti mangkuyog kadakuada iti pakaaramidan ti operasyon.
Inallukoy ni Dacanay dagiti mangayat iti nasao a programa a gundawayanda ti libre a pannakaidiayana gapu ta nangina ti magastos ti dumalan iti ligation.
