Inlawlawag ni Fr. Robert Somera iti Our Lady of Hope Parish Church iti Caoayan, Ilocos Sur a nagiplastarda manen ti “No to Black Sand Mining” iti sangwanan iti simbaan gapu ta patienna a saan a nasurot iti nagtutulagan idi napan a tawen maipanggep iti panag-dredging.
Iti pannaki-uman ti Bombo Radyo Vigan ken ni Fr. Somera, awan iti konkontraenna ta anamunganna ti dredging a maisayangkat ta pagsayaatan dagiti umuli ngem ti pakarikotanna ket saan a ti karayan iti pakaisaysayangkatan ti dredging no diketdi sidadata a mapapasamak iti kabaybayan.
Segun ken ni Fr. Somera, iti baet a marigatan dagiti umili iti sitwasyon ket agbutengda nga agsarita gapu iti napalpalabas a pammapatay a napasamak iti ili.
Kinunana a mismo nga isuna iti nakabasa dagiti death threat kadagiti tattao a padana a kalikagumna a lumaban isu a maawatanna latta no apay a saanda a makasarita ngem allukoyenna dagiti amin nga agindeg nga apektado nga agsarita ken tumakder tapno saan a mairurumen iti ilida.
Insaludsudna pay no siasino iti akin-bagi iti Isla Verde Mining and Development Corporation no apay a pati DENR ket kasla saan a malapdan iti ar-aramidenda a black sand mining.
