Malimitaran laeng kadagiti lugar a makapadpadas iti nangina a presyo ti deklarasyon ti food security, kas inlawlawag ti Department of Agriculture.
Segun ken ni DA Spokesperson Asec. Arnel de Mesa, ti emergency declaration ket basar iti Republic Act 12078 a mangamyendar iti Rice Tariffication Law.
Ti linteg ti mangted turay iti agriculture secretary a mangideklarar iti food security emergencies kadagiti lugar nga agkurang iti suplay ti taraon wenno nangina ti presyona.
Pinasingkedan ni DA Secretary Francisco Tiu Laurel Jr a ti gobierno ket mabalin nga agideklarar iti rice emergency kasaruno iti panangiruar ti National Price Coordinating Council iti resolusyon a mangirekomendar iti emergency gapu iti nakaro unay a panagpangina ti bagas.
Iti agdama ket kitkitaenda pay ti pinal a desisyon dagiti lugar a maapektaran iti deklarasyon.
