Adu pay dagiti karaman iti anomalya iti flood control scam a nasken a maimbestigaran kas pinasingkedan ti Malakanyang kagiddan ti panangikagumaan a makemmeg ken mapaawid ditoy pagilian ni Cong. Zaldy Co a maitudtudo nga utek ti flood control scam.
Segun ken ni Palace Press Officer Atty. Claire Castro, adu pay ti karaman iti korapsion a nasken a maimbestigaran kagiddan ti panangidaulo ni Presidente Ferdinand Marcos Jr ti panagimbestigar kaagiti amin a karaman iti anomalya iti flood control.
Innayon ni Castro a sakbay pay ti isyu ken ni Co ket imbutaktak ni dati a Cong. Rolando Andaya a 2018 pay laeng nga adda isyu iti flood control projects ken idi 2020 ket rimsua ti ghost projects.
Inyunay-unayna nga iti salinong ti Marcos administration laeng a naaddaan iti naun-uneg a panagimbestigar ngem nasken nga amin a karaman iti anomaya ken madusa iti linteg.
