Impakaammo ni Pres. Ferdinand Marcos Jr. nga awanen ti pondo para kadagiti flood control projects iti salinong ti 2026 proposed national budget.
Ti addang ket kasaruno dagiti nadiskubre a substandard ken ghost flood control projects.
Segun ken ni Pres. Marcos, saanen a karaman iti flood control iti 2026 budget iti Department of Public Works and Highways (DPWH) ta adda pay iti P350 billion nga alokasyon manipod iti 2025 iti saan a nagastos.
Kinunana nga agtultuloy latta dagiti proyekto kontra iti layos ngem rumbeng nga agbalin a naurnos iti panaggastos, disenyo ken pannakaipatungpalna.
Impaganetget ti presidente a rumbeng a leppasen dagiti kontratista dagiti proyektoda iti mayannatup nga specifications ken sungbatan dagiti gastos sakbay a makisarita manen iti gobierno kadakuada.
