VIGAN CITY – Maysa a fish vendor iti nagbekkel idiay Brgy. Pantay Fatima, Vigan City, Ilocos Sur.
Iti pannaki-uman ti Bombo Radyo Vigan ken ni PLt. Christopher Bueno a Deputy Chief of Police iti Vigan City Police Station, adda iti naawatda a report itattay bigat nga adda iti nagbekkel iti nasao a lugar isu nga insigidada a nagresponde ngem naibaban ti biktima a ni Jomel Ramos Castro, agtawen ti duapulo ket lima nga agnaed iti nasao a lugar.
Segun ken ni Bueno, burburtia iti panagpakamatay ti biktima ta awan iti naibagana a parikotna bayat ti panaginomda ti amana idi rabii.
Nupay kasta, bayat ti pannanganda ti asawana idi rabii ket naibagana a manipod pay laeng idi baro agingga itatta ket maikuskuspil ngem saanna nga inkaskason wenno saanen a nagsalsaludsod pay nu apay a naibagana dayta.
Kabayatanna, nagpalagip ti Deputy Chief kadagiti umili a nu adda man ti parikot a sangsangwen ket ipakammo laeng kadagiti tattao a pagtaltalkan tapno malag-anan ti rikna ket saanen a mapanunot a manggibus iti biag.
