VIGAN CITY – Nagkiddaw ti financial assistance iti probinsia kadagiti nadumaduma nga ahensya iti gobierno para iti pannakasimpa ken panangpasayaat manen ti turismo kalpasan iti napasamak a magnitude 7.3 a ginggined idi Hulyo a nakaapektaran iti adu nga imprastruktura.
Iti pannakipapatang iti Bombo Radyo Vigan ken ni Provincial Board Member Gina Cordero a Committee Chairman on Tourism ken Trade Industry, nangipatulodda iti resolusyon iti Department of Tourism, National Commission for Culture and Arts, National Archives of the Philippines, National Historical Commission of the Philippines ken Philippine Economic Zone Authority kasta payen dagiti congressman iti 1st ken 2nd district iti probinsia.
Segun ken ni Bokal Cordero, agtultuloy a nakalukat dagiti pagpasyaran iti probinsia ngem kadagiti naapektaran a sangapulo ket lima a simbaan ket saan a mabalin a papanan pakairamanan ti simbaan iti Vigan City ken Bantay.
Inlawlawag dagiti volcanologist a saan nga insigida a masimpa dagiti nasao a naapektaran ti ginggined ta masapul a palabsen iti innem a bulan ta agtultuloy latta iti marikna nga aftershocks a mabalin a mangapektar kadagiti masimpa ngem impasiguradona a kalpasan iti nasao a bulan ket masimpanton dagiti pagpasyaran a naapektaran.
Kadagiti mahilig iti falls ket saan pay laeng nga inrekomendar ti bokal iti panagturong iti ili ti Suyo kangrunaanen ti Vagina Falls ta adda iti maisaysayangkat a landslide nu agtudo ngem adda latta met dagiti dadduma a falls a mabalin a papanan a kas iti Pinsal falls iti ili ti Sta. Maria.
Inallukoyna dagiti turista nga agpasyar latta iti probinsia ta araramidenda amin nga addang tapno masimpa dagiti naapektaran iti didigra.
