VIGAN CITY – Naragsak ti Filipino Community idiay Hanoi, Vietnam ta impangruna ni President Ferdinand Marcos Jr. a makita dagiti Pilipino nga agtrabtrabaho ti nasao a pagilian ta apaman a nakasangpet para ti state visit-na ket nakisinnarak kadakuada idi January 29, 2024.
Iti pannaki-uman ti Bombo Radyo Vigan ken ni Bombo International News Correspondent Paloma Compipis, mangisursuro idiay Hanoi, Vietnam, napalaus iti ragsakda ta naimatanganda iti panagsarita ni President Marcos inaig kadagiti plano para iti pagsayaatan ti langen-langen iti nagbaetan ti Vietnam ken Pilipinas.
Segun ken ni Compipis, manipod pito ribo nga overseas Filipino workers idiay Vietnam ket umabot laeng iti 250 agingga 300 a Pilipino iti nakidar-ay ta weekdays wenno adda serrek iti trabaho ken pagadalan ngem uray pay adda iti klase ket nag-absent iti kaadoan kadakuada tapno gundawayan ti pannakakitada ti presidente.
Nupay kasta, namnamaenda a saan laeng nga ita a gundaway ti panagbisita ti presidente ta nasaritana iti maipapan ti nadumaduma pay a pakaseknanna nangruna iti patangan maipapan ti kinatalged ti coast guard ken maritime a posible a pagturongannanto manen iti nasao a pagilian.
VIDEO – BINC PALOMA COMPIPIS
