VIGAN CITY – Nasurok sangaribo a mangmangged a naapekataran iti lockdown idiay Cambodia ti natulonganen ti Samahan ng mga Pilipino sa Cambodia a maysa a grupo a binukel dagiti Pilipino iti nasao a pagilian ken addaan iti nasurok duaribo a miembro agingga idi April 18.
Dayta ti pinasingkedan ni Bombo International Correspondent Romyr Libo-on a taga-Iligan City, mangidaulo iti nasao a grupo a nabukel idi 1992.
Segun kenni Libo-on, idi April 11 ket inrugidan ti nagiwaras kadagiti food subsidy kadagiti mangmangged a naawanan ti pagsapulan a ti pondo a naaramat ket babaen iti boluntaryo a panagkokontribusyon dagiti Pilipino a naayat a timmulong.
Malaksid iti dayta, timmulongda pay iti repatriation wenno panagawid dagiti nakurang a duagasut a Pilipino a na-stranded iti nasao a pagilian isu nga iti agdama ket yur-urayda ti pammilin iti Philippine embassy.
No pay kasta, kuna ni Libo-on a dagiti laeng gangannaet iti maap-apektaran iti COVID19 ken awan pay ti Pilipino.
