Nagballaag ti Thailand Food and Drug Administration a saan a natalged iti salun-at ti maysa a batch ti sikat a Thai herbal inhaler.
Maibasar iti Bangkok Post, saan a nakapasa iti microbial test ti “Hong Thai Formula 2” ti Hong Thai Panich.
Limmabes daytoy iti limit para iti Total Aerobic Microbial Count, Total Combined Yeasts ken Mold Count, sa adda pay iti Clostridium spp-na.
Ti apektado a batch ket adda production number-na a 000332; adda 200,000 a units-na; naaramid idi December 9, 2024; ken ag-expire inton December 8, 2027.
Inikkaten ti kompania kadagiti pagtagilakoan ti delikado a batch ken impasiguradoda a natalged ti produksiondan manipud ita.
Nabalakadan met ti publiko nga agannad iti panaggatang ken panagaramat iti nasao a herbal product.
