Nangaramid iti fast lane ti Rural Health Unit iti ili ti Sta. Cruz, Ilocos Sur para kadagiti mapapati a leptospirosis patient.
Dayta ket kalpasan nga adu dagiti agindeg ti nakarikna iti agduduma a sintomas ken addan maysa a kumpirmado a natay gapu iti nasao a sakit.
Iti pannaki-uman ti Bombo Radyo Vigan ken ni Dr. Elalin Joven Javillonar, Municipal Health Officer, imbestigaranda no kasano a nagraira ti nasao a sakit iti lugarda ta adda dagiti nagkuna a na-expose-da iti layus iti kalkalpas a bagyo.
Nabilinda metten ti kapitan ti barangay nga ipanda iti ospital no adda man dagiti agindeg a makarikna iti sintomas.
Libre nga ipaay ti RHU ti testing ken agas kadagiti naapektaran nga agindeg.
Nagpalagip kadagiti agindeg nangruna dagiti makarikna iti sintomas a saanda a madanagan ta nakasaganada latta a tumulong.
